Chaw ei khawmnaah mi dang zawng zawng an mut muan tawh laiin i hrawkah thil ri thu thut awmin, i la phu uih uih zui thin em? Engtiangin nge khatianga i awm chhan kha hriat a, mawhpuh mai tur te pawh i zawng ruai thin ang ti raw? A chhan ber chu i awm leh dul daidangtu tihrawl kum kulh mai vang kha a ni.
He tihrawl kum khulh mai, Hâm kan tih hi a tlangpuia a hnathawh dan chu – boruak kan hip luh rual hian chuapa boruak lut tur lo puiin, hnuai lam zawngin a lo pawt thla thin a. Boruak kan thawk chhuah leh rual hian chuap atanga kan boruak paihchhuah min lo pui turin a awmna pangngaiah kirin, chuap a rawn nawr tawm chho leh thin a ni.
Mahse, a chang chuan he tihrawl, Hâm hi a nih tur ang a ni lo thin a. Hetiang a lo nih hi chuan a i thawk luh zawng khan a inpawt thla ta sawk sawk mai thin a. Hetia boruak chak taka lut thlain i aw bawm a zu den chiah khan a lo irhfiak ta thin a ni.
Hetianga hâm awmtir theitu tam tak zinga thenkhat chu rang lutuka thil ei te, thil ei tam lutuk te, chaw kawng leh thawkna dawt lam fel loh vang te, zàm lutuk vang emaw làwm lutuk vang te emaw a ni thei a ni. Irhfiak hi a tlangpuiah chuan minit rei lo te a ni tlangpui a. Irhfiak thenkhat chu nil eng te emaw, a kar a kar te emaw pawh a awh thei a, mahse hetia rei tak irhfiak hi chu thil pangngai a ni lo a, natna engemaw awm vang a ni thei a ni.
Irhfiak tihreh dan tam tak an sawi i hre tawh ngei ang a, nang pawhin eng engemaw chu i ti ve thin tawh ngei ang! Mizo zingah chuan dawt inhrilh a tha tih te a lar hle. Thawk la miah loa muang changa 1 atanga 10 thleng chhiar a tha te pawh an ti a. Thenkhat chuan thaw miah loa tui in te pawh a tha an ti.
Mahnia inenkawl dan:
Irhfiak hi a tlangpuiah chuan rei lo teah, darkar pawh tling loah a reh mai thin a. Amaherawhchu, tihreh tumin hetiang hian i ti thei bawk: muang changa tui vawt in te, thaw loa rei vak lo awm te, i chil lem laia zawi tea i hnar hmeh pin te, thei thur ei te, bawkkhupa mut te pawh a thei a ni.
Daktawr rawn hun:
I irhfiak chu darkar 48 emaw a aia rei emaw hnuah pawh a la reh lo a nih chuan daktawr pan ngei ngei ang che. Daktawr chuan i natna hrang hrangte a lo endik dawn a ni. Tin, i irhfiak chu a khat tawka a rawn awm nawn leh fo a nih phei chuan Specialist rawn ngei ang che.
Irhfiak nasa tak chi hi chu a chhan a zirin damdawi hmanga enkawl mai thei leh zai hial ngai te pawh a awm thei a. Damdawi hmanga enkawl chi a nih chuan damdawi pangngai leh homoeopathy-ah pawh enkawlna tha tak tak a awm a ni.